Cuntributos po sa bidda ‘e Bitzi a pustis de s’alluvione

Dae sa Regione Sarda in pahu tempus sunt rennessios a faher medas hosas

Di: Carlo Crisponi

Non sunt holaos mancu 3 meses dae hando in Bitzi est sutzessu s’abolottu po more ‘e s’abba hi est halà a unda in intros de sa bidda , pihandeche 3 tres pessones e lassande dannos mannos in sas domos.

Sas dies holàs sunt andaos a Bitzi sos de sa Protetzione Tzivile Nazionale e sos de sa Regione Sarda, po hontare sos dannos e po cumintzare a lis mandare un’azudu a sos Bitzichesos.

“ In sa Regione ant triballau totus po cottiare a lis dare su dinare a hie at tentu dannos dae s’alluvione, hando a pahas dies cumintzamus a lis imbiare sos cuntributos”.

Sunt sas paragulas de su Presidente de sa Regione Sarda, Christian Solinas.

Su Presidente at sighiu a narrer: “ in pahu tempus semmus rennessios a faher totu hantu, gratzias a su triballu hi ammus attu nois de sa Regione hin s’Istadu Italianu, a sa ine de su 2020 si che d’ishiat hi a sos Bitzichesos lis tohavat 10 miliones de euro, semmus crihande de ahuntentare totu sas pessones hi ant tentu dannos”.

At histionau bintzas s’Assessore Regionale de sa Difesa, Gianni Lampis: “semmus crihande de torrare totu a sa normalidade, in pahu tempus ammus attu una hosa manna, hustos cuntributos po sa bidda ‘e Bitzi est unu sinzale hi non los ammus lassaos mai solos”.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22