Alcoa, su 14 de custu mese s'at a detzidere su de faghere
Su ministru de s'Isviluppu at a ojare sos sindacados e sa Regione
Di: Pietro Lavena
Gioja, su 14 de su mese de Nadale, a mesudie, su ministru de s'Isviluppu economicu Carlo Calenda at a ojare sas segreterias territoriales e natzionales de sos metalmeccanicos de Cigil, Cisl e Uil, su presidente de sa Regione Sardigna Francesco Pigliaru e s'assessore a s'Industria Maria Grazia Piras.
Ant a faeddare de Alcoa. Tiat poder essere s'ultima bia dadu chi su guvernu Gentiloni est pro finire su tempus sou e su ministru Calenda e tottu at nadu chi prima de arrivire a sa fine cheret resolvere sa situatzione.
A cantu paret, est fatzile chi sa multinatzionale isvitzera de s'alluminiu Sider Alloys si detzidat a comporare s'istabbilimentu de Portovesme . Sa frimma de su cuntrattu tiat arrivire poi de una trattativa intaulada dae paritzos meses chi at bidu su Guvernu arrejonare pro maicantu tempus chin sa Sider Alloys. A dare una bettada de manu a sa trattativa est istada Invitalia, s'agentzia natzionale pro sos investimentos e s'isviluppu de s'impresa in Italia.
