Dae su 7 de Giannalzu sas iscritziones a s'annu iscolasticu nou
Su 44% de sos istudentes de tertza media no ischit balu a inue andare
Di: Pietro Lavena
Dae su 7 de Giannalzu sos istudentes s’ant a podere iscriere a s’annu iscolasticu nou. De sos maicantos giovanos chi ant a devere passare dae sas medias a sas superiores, guasi su mesu (44%) no ischit balu a inue andare.
Lu narat su situ Skuola.net chi at fattu una indagine subra de 4miza istudentes de sas tertzas medias in collaboratzione chin Radio24.
Sos istudentes ischint chi est importante de seberare bene. S'89% pensat chi sas iscolas superiores siant unu de sos mamentos pius importantes de sos istudios e pro su tribagliu chi ant a faghere cando ant a finire de istudiare.
Segundu Google Trends sa Sardigna est una de sas regiones chi ant chilcadu de pius sas paraulas "iscrizioni online" in s’ultima chida.
Duos istudentes subra de tres ant a ischirriare unu liceo; su 21%, preferit sos istitutos tennicos; su 9% sas iscolas professionales; su 4% unu cursu regionale de formatzione professionale. Custa tendentzia est cunfrimmada dae sas istatisticas de sos ultimos annos, mancari cambiet unu pagu dae logu a logu.
In su Sud sos liceos restant sas iscolas preferidas. In su Nord, imbetzes, sos tennicos ant numeros sempre pius altos.
Su chi timent de pius sos giovanos est de no agattare tribagliu cando finint sas iscolas. Pro custu motivu su 24% est cunvintu de che essire a fora de s’Italia pro tribagliare.
